Leif Rune Løland

Bergen ventar over 400 cruiseskip neste år, som er ein auke på om lag 10 prosent. Auken kjem ikkje i juni og juli, men hovudsakleg om våren fram til mai og noko frå august og utover. Talet på cruiseturistar i sommarmånadene er faktisk 20 prosent lågare enn før pandemien.

Statsforvaltaren i Vestland varslar kommunane om at reguleringsplanar som manglar dei vurderingane Naturmangfaldlova krev, «sannsynlegvis vil bli oppheva». I eit brev forklarer han kommunane krava i naturmangfaldlova og plan- og bygningslova. Bakgrunnen er fleire opphevingar fordi kommunane ikkje har hatt godt nok kunnskapsgrunnlag eller tilstrekkelege vurderingar av følger for naturmangfaldet. Til dømes i Bømlo, Bergen og Øygarden.

A-krimsenteret i Vestland gjennomførte ein todagars kontrollaksjon i Bergen for å undersøke arbeidsforholda i app-basert matlevering. Kontrollane avdekte teikn på mogleg svart arbeid, feil eller manglande rapportering av omsetning, manglande momsregistrering og mogleg trygdemisbruk. Fleire bod var ikkje registrerte i Aa-registeret, og nokon utførte oppdrag via andre personars brukarprofilar i leveringsappane.