Arantxa Elizegi Egilegor

Delcy Rodriguez jarduneko presidenteak jakinarazi zuen atzo dagoeneko bere onera itzuli dela argindar azpiegituraren %75 eta ur hornidura katearen %68. Rodriguezek azaldu zuenez, azken orduetan bizirik atera dituzte hainbat agun hondakinen artetik, eta beraz, erreskate lanek aurrera jarraituko dute. Lau egun igaro dira bi lurrikara gogorrek Venezuela jo zutenetik, eta erreskate lanek aurrera jarraitzen duten arren, desagertuak bizirik aurkitzeko itxaropena gutxituz doa.

Orotara 1.778 ikaslek eskatu dute unibertsitatera sartzeko proban egindako euskarako azterketa berrikusteko, ikasle guztien %14k. Eskaera egin duten ikasleetako zenbaitek 0 atera zuten azterketan. Hala azaldu du gaur arratsaldean Euskal Herriko Unibertsitateko errektoreak, Joxerramon Bengoetxeak, Bilbon egindako agerraldi batean. Bengoetxeak nabarmendu du notak «behin-behinekoak» direla, eta behin-betikoak datorren astelehenean argitaratuko dituztela.

Urruñako (Lapurdi) Xabier Zabaleta apaiza kargutik kendu du Baionako elizbarrutiko apezpikuak, adin txikiko bati egindako sexu erasoengatik. Apaiza Beziersen (Okzitania) zegoela gertatu ziren erasoak, 2024ko ekainean, baina Baionako elizbarrutiko arduradunek azaldu dutenez, aurtengo martxoan izan zuten eurek salaketen berri. Montpellierreko (Okzitania) artzapezpikuak izan zuen lehen aldiz gertatutakoaren berri 2024ko udan, eta hark jo zuen justiziari gertatutakoaren berri ematera.