Halldór Guðmundsson

Eftir sveitarstjórnarkosningar 16. maí n.k. er tækifæri fyrir núverandi frambjóðendur og væntanlega sveitarstjórnarfulltrúa, til að setja málefni aldursvænna samfélaga ofarlega á dagskrá í sínu sveitarfélagi. Við Íslendingar stöndum frammi fyrir breytingum á lýðfræðilegri þróun. Breytingin felst í að fólki á efri árum fjölgar nokkuð hratt og lifir lengur en áður.

Aðgerðir til að mæta þjónustuþörfum stækkandi hópi eldra fólks eru í hefðbundu fari - að setja af stað ferli eða lausn sem felast í auknum verkefnum í byggingaiðnaði. Nýjar byggingar leysa bara ekki þjónustuþörf við eldra fólk – það gerir starfsfólkið. Þó markmiðið með byggingu hvers hjúkrunarheimilis kunni að vera göfugt, vekur það samt mikilvægar spurningar: Er þetta fljótvirkasta, raunhæfasta og hagkvæmasta leiðin til að bregðast við öldrun þjóðarinnar?

Viðhorf og flokkun fólks í unga og gamla, endurspeglast í daglegum samskiptum fólks og líka hvernig við lítum á okkur sjálf. Eitt af því áhugaverða við almenn viðhorf gagnvart aldri, er að þau lýsa ekki aðeins afstöðu til einhvers annars – heldur gjarnan líka óttanum sem við sjálf erum að kljást við gagnvart öldrun og eldra fólki.