Igor Susaeta

Memorandum bat sinatuta egonagatik AEBek eta Iranek arre eta iso jarraitzen duten honetan, Ali Khamenei Irango lider gorena omentzen hasi dira gaur Teheranen. Agintariek hiriburua blindatu dute, eta aurreikusten dute bihar eta etzi artean 15-20 milioi pertsona inguru helduko direla hara 1989tik aurtengo otsail bukaerara arte herrialdeko agintari erlijioso gorena izandakoa agurtzeko asmoarekin. Hasteko, gaur, Mosala meskitara eraman dute Khameiren gorpua.

Konparaketa bat. Donald Trumpen enpresek 622 milioi dolar inguruko diru sarrerak eduki zituzten 2024an. Artean Etxe Zurira itzuli gabe zegoen. Bueltatu zen iazko urtarrilean, bihurtu zen berriro AEBetako presidente, eta are gehiago aberastu da. Iaz eduki zituen diru sarreren berri eman dio Gobernu Etikaren Bulegoari, eta txosten horrek erakusten du 2.200 milioi dolar inguruko sarrerak eduki zituela 2025ean; alegia, 545 milioi euro inguru—.

Gerra hotz gisako batean daude Iran eta AEBak. Beren arteko auziaren konponbiderako memorandum bat sinatu zuten duela bi aste, bide orri moduko bat datozen bi hilabeteetarako. Baina elkar ulertzetik urrun daude. Azken egunetan ikusi ahal izan da. Batak esaten zuen baietz, Dohan biltzekoak zirela bi aldeak. Besteak, ezetz. Eta ondorioz, aldeek elkarri egindako ohartarazpenak, eta eraso batzuk Persiar golkoaren bueltan.