Isabel Jaurena

Vox alderdiak 2024ko apirilean Azpeitian (Gipuzkoa) egindako agerraldi baten kontra protesta egin zuten herritarrek, eta haietako hogeik epailearen aitzinean deklaratu behar izan zuten —alderdi horrek jarritako salaketek abiatu zuten auzia—. Bada, Azpeitia Errepresioaren Aurka plataformak ohar bidez jakinarazi duenez, epaileak behin-behinean artxibatu du gazteen kontrako auzia.

Bi familia etxegabetze arriskuan daude Donostiako Añorga Txiki auzoan, eta tartean 2 eta 13 urteko adingabeak daude. Hala jakinarazi du Donostiako Etxebizitza Sindikatu Sozialistak, gehituta bi familia horiek berralokatuta dagoen etxe batean bizi direla. Etxe horren alokairu kontratua duen pertsonak logela bana berralokatu dio familia bakoitzari, hilean 500 euro baino gehiagoren truke; kontraturik gabe.

Joan den urteko irailean eman zuen Iruñeko Zigor arloko 3. epaitegiak Aroztegiko zazpien epaia: kartzelarik ez, baina guztiek isunak ordaindu beharko dituzte. Proiektuaren sustatzaileek erabakiaren aurkako helegitea jarri zuten, baina Nafarroako Justizia Auzitegi Nagusiak ez zuen aintzat hartu helegitea.